لاضاق صدري ما يضيق احتمالي
ولو الأمـور كبار تصغر بعيني
مـاني بخـيلٍ يحتفظ بالريـالـي
يموت وتأكل مالـه الوار ثيني
ولاني من اللي يحب كثر الجدالي
لا شفت بعض الناس متخالفيني
وجهت وجهي لواحـدٍ لا يزالـي
رزقي عليه وما قسم لي يجيني
يا لله غيرك مـالـنا رب والــي
لا قَلَّت الخلان فأنــت المعيني
منك استمد المـال لا قـل مالــي
ولك التجي يارب وأرفـع يديني
أنت العظيم اللي علـيك اتكـالي
يامن عليك الخلــق متوكليني
وأنت الذي تعطي العطـايا الجزالي
وعطاك ياجزل العطايـا سميني
يا واحدٍ مـا غيرك أحـدِ نسـالي
أيضا وجميع الخلق لك مرتجيني
ما خاب من يرجيك ياذا الجلالي
يارب يا غافــر خطا المذنبيني
من غير بابك قـط لا ملتجالي
بابك وسيــع وياسع الملتجيني
لا تشغل بـدنياي يـارب بالي
يا عالمٍ حالـي وخافــي كنيني
وأنا أعلم اني زايـلٍ لا محالي
والناس مثلــــي كلهم زايليني
رحمتك وإلا مـا يفـيد احتيالي
إلا أن رحمني أرحـم الراحميني
وأنا أحمد الله الخـالق المتعالي
اللي خلقنا من تـــرابٍ وطيني
ومن بعد حمدي لخالقي وابتهالي
القادر اللي قدرتــــه ما تليني
ان صار أو جـا للنصيحة مجالي
ياجب علينا ننصــح المسلميني
أول نصيحة قبل كل مـا يقالـي
خمسة فروضٍ كل حيــن بحيني
شهادة وصلاة وصوم وزكاة مالي
وحجٍ لبيت الله فـــرضٍ يقيني
فروضٍ علينا واجب الامتثالي
طاعة لرب الكــون متجاوبيني
نخلص عملنا قبل يوم الاجالي
ولا نتبع العاصي على فعل شيني
قبل التراب اللي علينا يهالي
في حفــرةٍ من دونها الملحديني
نبقى بها ما حدٍ علينا يسـالي
وعلى جميــع أعمالنا محاسبيني
وثاني نصيحة موجهة للعيالي
شبابنا اللــــي للعقل مدركيني
تذكروا يا عيال و أنتوا طفالي
ذكــرى عسـاها تنفع الذاكريني
اللي عليكم يسهرون الليالـي
وكـم ليلةٍ يقضونــها ساهريني
ياعيال لا تنسون ذاك الدلالـي
و أنتوا صغار و توكــم دالهيني
لا صاح واحد كم وهو ما يبالي
فـزوا لو انهم توهـــم نايمني
ويا ما عليكم مدمع العين سالي
لـو غاب واحدكـم ولو ساعتيني
ترى السعيد اللي رضا الله ينالي
ويا سعد من يكسب رضا الوالديني
وإلا ترى الدنيا سوات الضلالي
و لا أحـدٍ بها يبقى من الخالديني
ياما فنت مـن طيبين الفعالـي
و حنا ترانــــا مثلهم فانييني
ومن عاش بالدنيا سنين طوالي
لا بد ما تفنيــه طوال السنيني
وثالث نصيحة بالقـريب الموالي
حقٍ عليـــه الناس متعارفيني
ياجب علينا الوصـل والاتصالي
باقـــرابنا ونكـون متعاونيني
لا خير في رجـلٍ وحيد انعزالي
لا صار ما به نفــع دنيا وديني
لا صار مابه نفع عـمٍ وخـالي
عده لو انه حــي من الميتيني
ترى اليمين بحـاجةٍ للشمـالي
و ترى الشمال بحاجــةٍ لليميني
ورابع نصيحة كسب مالٍ حلالي
و لا خير في مالٍ حــرامٍ يهيني
المال تكبر به نفوس النذالـي
والنفس لا كبرت تراهــا تشيني
لو كان يرفا بالرجال الخمـالي
فاحرص على مالك وخلك ذهيني
تلقاه لا مـالـت عليك الليالـي
وتساعــد المحتاج والمعسريني
من زاد ماله صار للنـاس غالي
أدنــوه لو هو قبل من المبعديني
ومن قل مالـه مابغوه الرجـالي
لا صار في حاجــة وهم مغتنيني
وخامس نصيحة بالكتاب المثالي
تعلمــوه وعلمـــوا الجاهليني
قـرآن أبـان الله فيه الحـلالي
وحرم علينا كل شيـــنٍ مشيني
وبين لنا فيه الهدى و الضـلالي
ما دامنا بما فيــــه متمسكيني
لا تتركـونه عـرضـةٍ للإهمالي
يطمـــع بكم من فيه حقدٍ دفيني
لا تتركون لكـل حـاقـد مجـالي
لا شافكم عن دينكـــم معرضيني
تدخل اللي به جروحٍ عضالي
وأنتم قبل سد توابـــه العالميني
وصلاة ربي عد وبل الخيالي
على الشفيع وسيـــد المرسليني
محمد المبعوث بـدر الكمالي
وصاحبتــــه والآل والتابعيني
ليست هناك تعليقات:
إرسال تعليق