إهداء الى الأخ العزيز الشيخ نايف العصيمي (أبو محمد)

عد القلم عده عسى الخاطر يجود

واكتب لنا المطلوب عبر الرسالة

ترحيب وأشواق وتحيـات وورود

مـن قول من لا قال ماضاق باله

متصفح التاريخ من عـدة عهـود

يقـــرا الكتاب وكلمته باعتداله

ومجالها ما هـو بضيق و مـحدود

من منهلٍ جـــمٍ وعذبٍ انهاله

وضمنتها بالطيب والمسـك والعود

وعبـرت من زين المثايل اجزاله

عبرتها من فكر صـافي ومجهـود

آخذ جزيل القيل وأتـــرك هزاله

مصيونة من كلمة النقص والـزود

ولا حـــرفوا فيها يمين وشماله

ماجابها الهـدهـد على عهد داوود

ولا هــي على كل البشر مستحالة

عرج على اللي ينطح الضيم والكود

ويشيل حملك لا تعــــذر مشاله 

من ساس مرفوع النسب عالي جدود

عز الصديق وعز من هـــو عناله

نايف حليف المرجلة كـاسب الجـود

هو ليه ماسموه متعـــــب دلاله

ذبـاح حيلٍ فـوقها السمن مـردود

بالطيب والمعـــروف نـادر امثاله

دنيا ودين وكـل ما قلت مـوجـود

وفيه البشاشــة والكـرم والبساله

وفيه الذكا وفي كل الأوصاف محمود

ياحـــي هـاك الوجه وياحي فاله

غير الوفـا بالجـار و العلم ماكـود

معرب الجـدين عمــــه و خاله

ما قلته إلا عـن تجـاريب و شهود

وكلٍ مـع الحيين تذكــــر فعاله

يابو محمد يا بحـر مـالـه حـدود

لا صار بالدنيــــا عـدال ومياله

لا نـوم جـاني و لا تهنيت بقعـود

ما غير أعـدي مشمرخـات الطواله

أعوي عواء ذيبٍ على رأس عمرود

حــزمٍ طـويلٍ واعتلى رأس جـاله 

أخطا الحلال ولا كسب عقبها فود

وأمسى يجر من العـوى والعواله

لا جا توالي الليل سهران مانـود

طار الكرى و العين زايــد هماله

بس أتوجد كل ماهبت النـــود

واللي على بالـــي صعيبٍ مناله

يالله يامفرج عنا كل مضهــود

يا واحــدٍ عبـــدك عليك اتكاله

تجعل جميع أيامنا سهود ومهود

وترحم عبــــادك ياعزيز الجلاله

وصلاة ربي عد ماخضر العـود

على النبي وإعداد وبــــل الخياله