قال المثل ما يغسل الدم بالدم

ما هل رعادٍ  غيومـــه تـراكم

عبر البروق اللــي تلاعج سناها

مزنٍ من المنشا وسيلٍ عـرمـرم

تجري بـــه الوديان من قوماها

أطلبك يـاربٍ لـه العبــد سـلم

نفسي على زيـــن الكلام تهداها

وإنك تـوفـقني الجـواب  المحكم

الكلمة الزينـــــة يزين محكاها

يا من على المخلوق من فضله أنعم

تفـــرج همومي يا مفرج عناها

قصـدت بـابـك يالعظيم  المعظـم

يامرزق الداب العمـــى في خباها

تسمع دبـيب النمل  بالليل  الاظـلم

على الصخـــر بالليل تسمع دباها

وأنت الـذي في كـل  قـدرة  تحكم

وقدرتك فـــوق القدرة اللي نراها

تحيي  الـرميم  اللي فـنى أو تهشم

وان قلت كـــن للشئ كان وتناها 

وكـل شئ عندك للخـلايق محتم

وخيرك شمل كل العبـــاد وكفاها

يقول من قـاسا الزمـان وتعـلم

وقد جـاوز الخمسين أو في حراها

وليـا تكـلم عـارفٍ وش  تكلـم

خمسين عام مـن التجارب قضاها

مـن خلقت الدنيا ومـن خلقت آدم

ماحدٍ بهالدنيا سلـــم من غثاها

رجال الشـدايد للشـدايـد تحيـزم

مادام ماداع المنيـــــة دعاها

رجالٍ لهم تـاريخ و فعـول و همم

وكما بياض قلبــوها أبيض ثناها

ما تنـحي للـذل و لا تقبـل الـذم

والنفس لغيـــر الله تأبا انحناها

والطيب مـن رب الخـلايـق مقسم

والناس من مقسومهـا الله عطاها

لو كان بعض الناس من الطيب محرم

يموت ونفسه ما رفــع مستواها

ذاك البخيل اللي عـن الطـيب  ملجم

يتعب علــى الدنيا وغيره ولاها 

وعديت راس مشمرخٍ يفرج الهم

في راس عيطا منـوة اللي رقاها

وبديت في رأس الطويل أترنـم

كنــي على روس الطوال اتباها

وقلت الكلام اللي له القلب ترجم

بعبارةٍ يطـــرب لها من قراها

ومن عانق طوال المراقيب يفحم

ومن هاب عسـرات الطوال اتقاها

قلبي على طوال المراقيب مغـرم

اللي شغف قلـــب المولع هواها

لاذعذع النسناس و الجــو غيم

العصــر قبل تحين ساعة مساها

وراع القريحة هاض ما خمها خم

رتب معانيها وشيـــــد بناها

ولو كان ما بالقلب من هم يهضم

ما سقت رجلــي للطوال وعلاها

كني صويبٍ  تالــي الليل يزهم

من حر مابه دمعتــــه ماقواها

أوكن في قلبي سنا النـار يضرم

نارٍ توقـــــد بالضماير لظاها 

وبديت في شـرح الكـلام المنظم

أخاطب رجالٍ ما يتغيـــر لغاها

ناسٍ تقـدرها ونـاسٍ تكـــرم

وناسٍ زعلها يستـوي مع رضاها

وخير الكـلام اللي بعيدٍ عـن النم

وكـبـر النفوس أسباب داها وبلاها

وأحشم نفسي عن المسبات و الذم

ولا أقول كلمة ما عرف وش وراها

بعـض الرجـال يقـول ثـم يتندم 

كلمة خطا ترجع على اللي حكاها

وعندي الهام ومن ولي الكون ملهم

أعـرف الرجال وقدرها ومستواها

الطفل يكـبر و الغشـيم  يتعلــم

والنفس تمرض والنصيحـة دواها

وليا وليت ارحم ترى الخـالق أرحم

ولا تحسب إنك دايـــمٍ في رخاها

ولا بـد للظـالم مـن ظـالم أظلـم

والظالمين الله يعجـــــل فناها

ودارٍ بـلا عـزٍ  عسـاهـا تهـدم

ولا خير بقــوم ما يذري ذراها 

ومن يتقي شـر المخـاليق يسـلم

ومن عاشر أهل الشر حصل أذاها

    ومن يجحد المعروف لو كان ابن عم

يجحــد ثنا أمه ويتحمل دعاها

سـدك عليه بوسـط قلبك تكتــم

والله يعلم بالقلــــوب وخفاها

لا صـرت تفهم مثلك النـاس تفهم

والعلم يوخذ من أفــواه علماها

 بعض الكـلام يصير معنـاه  مبهم

وبعض الأمور يصير فيها اشتباها

وافطن تـرى المشبوه حول المحرم

ومن عز نفسه عن خطرها احتماها

قـال المثل مـا يغسل الـدم بالـدم

وبعض العيون اللـي كحلها عماها

والـناس منهم من يعـرف و يغيشم

ما هو جهـل بالناس ذا من ذكاها

ومنهم كـلامـه حـلو لكن  مسمـم

حلوين الألســـن لا يغرك حلاها

وبعض الرجال إن قلت له  قال لك تم

وبعض الرجال يصيـر فيها سفاها 

ومن قال أنا هزام الأبطـال  يهزم

لا قامت الهيجـــا ودارت رحاها

    ومن عاشر السفهان يضرب ويشتم

ومن شاف عيب الناس عيبه نساها

والنفس  لا زامـت لا بـد تـرغم

ومن طاع نفســه بالمهالك رماها

كـل قفل لـه مفـتاح فيه  يتحكـم

ومن عاشر أهل العرف يكسب رياها

كـلٍ يصـير بغيبة الليـث  ضيغـم

وكثــر الاريا تخلف عقول عقداها

ومن زان منطـوقه مـع الناس يكرم

                                         والناس منـطقها يـزيد  بـغـلاها

أحـدٍ كـلامـه  فيه  للنـاس بلـسم

وكلمته عنــد الناس يكبر صداها

وأحدِ اليـا مـنـه تكـلـــم تلـعثم

حيث الخطابة من اختصاص خطباها

ومن قـال قـــولٍ فيه يجبر ويلـزم

وأهل الوفا ما حـــدٍ يشك بوفاها

دنـيا بهـا كـل الخـلايـق تـزاحـم

ناسٍ أسعدها الوقـت وناسٍ اشقاها 

واللـي يبي الطـولات يتعب و يهتم

حتى ينال الغاية اللـــــي يباها

يسهر طـوال الليل كالذيب الاسحـم

قدوة سراحينٍ تـــــدور عشاها

ويارد وميـراده مـن المنهل الجـم

حيث الرسوس تخيب اللــي نصاها

ومن عاشر أهل الطيب يكسب ويغنم

و من عاشـــر الرديان يردا ردها

ومن عاشر أهل الشـر يخطي ويأثم

ويمشي مماشيها ويخطــي خطاها

تـرى  اللسان يقـال  مفتـاحه الفم

ومن زل في كلمة تحمـــل جزاها

لا تصـدق الكـذاب لـو أنـه أقسم

بربـه ومعبوده ورافـــع سماها

عنتر بـدوره وان عثر فيه الأدهـم

النـاس في عثراتهــا الله ابتلاها

ولابد مـا تشرب مـع الصبر  علقم

و لا فيه كـاسٍ ما تعكــر صفاها

ولا طـار طيـرٍ و ارتفع ثـم حـوم

و زانت لـه الدنيــا على مابغاها 

إلا وقع عقب ارتفـع ثم تحطم

من عالي القمــة لسافل وطاها

يا مومن الدنيا بها لا توهــم

دنياك  لو تضحك سريــعٍ بكاها

دنيا كفى الله شرها ما  تصادم

تكسر جـلاميد الصخــر بمعداها

قاري لها تاريخ ماضي و معجم

ومصادره تثبت صـدق من رواها

وحبالها لو هي قـوية  تصـرم

ما قيلك ما هـــي وثيقة  عراها

وحياضها لو هي مـلاية  تثلـم

وورودها تصـدر وهي في ظماها

كاسٍ بها حلوٍ و كـاسٍ بها سـم

وكم طوعت من لا يطيـع بعصاها

ومن كان فيها قاس الرأس يرغم

ويطيع لو هو قاســيٍ من قساها

وكم من عـزيـزٍ ذلته ثم استسلم

وكم من طبيبٍ علتـــه ما براها

وان قلت أنا عالم ترى فوقك أعلم

وعندك حـــدودٍ لا تجاوز مداها 

ربك حكيم وعن خطا الناس يحلم

لا كبرت الزلة عـــلى من جناها

وختامها ما حـج للبيت وأحـرم

متنحرٍ مكـــــة وقاصد حماها

صـلى عليك الله ربي وسلــم

يا سيــد الأمة وقايــــد لواها