قـال الوسيدي محكمات المثــــــايل
من هـاجس بالقلب هيض خفاياه
مـادام راسي حي مــــاني بسـايل
و ليا دنت فالمـوت مـــــامنه منجـاه
و قبيـــــلتي لافاخروا بالـقـــبايـل
حـرب هل اللقوات يـوم المـــــلاقـاه
ياما احتموا من محصنات الحلايـل
و حريبهم ضـاقت بـه حـدود دنياه
و لي في مجال الشعر بيوت جزايل
ومن لا يجيد القـــاف مـا جـاد معناه
نفـــــسي تهـــــقـوني على كـل طـايل
مـرقـاب عـالي مـــنــــوة اللي تعـلاه
مـرقـــــاب أفـرج بـه همــــوم ثــقـايـل
هموم على هموم تــــزيــــد المعـــاناه
ما فـوقه إلا الـريـــــح عبر المخـــــايـل
لا ذعــــــذع الغــــــربي تعليت مـرقـاه
مـدهـال ذيب ما حصـل له حصـايـــل
ذيـــــب يــــــروع تـالي اللــــيـل بعواه
على مد شوف العين بالعين أخــــايـل
و لا كـــــل زول لاح للعـيــــن تـــبـــغـاه
و تجـددت بعـض الجـــروح الاوايــــل
اللي بمكـنـون الحـشــا في حنــايـاه
وأحس في صدري سـوات المـلايـــل
و عـزي لمـــــن مثلي زمـــــانــــه تحــداه
ولازال دمـع العين من العين سـايــل
وقلت آه ياوقت على الناس ما أقساه
وقــت علـو به قـــــاصـرين الفــعــــايـل
هـذا الـزمــان اللــي دهــتـــنـــا رزايـاه
أهـل الـريا و الكذب و أهل التحايل
كثروا بــــوقـت كـل طيــّـب فقـــــدنـاه
و إن قلت أقول الصدق قـالوا محايل
الصـدق مـــات و على فكــــره دفناه
ارفـع جنــــابك عــــن جميع الـــرذايـل
وعن كـل مايـرديك مـن حيث مبـــداه
وإن شفت في بعـض الأوادم خمايل
حـذراك مـن كشف العيوب المغطـاه
استر عيـــوب النــــاس دق وجــلايل
دام الأمـــــر بيـــــدك وتــقــــدر تـلافـاه
لا تقول قـال فـلان و فـلان قــــايـــل
تـوكـــــد مـــن العـــلــم مــن ويـن ملفاه
لا صـار مـاعندك شــــهــــود ودلايـــــل
لا تقـول قـــول غيرك الــنــــاس تنــفـــــاه
بــــعـض الاوادم ينـــكـرون الجمـــــايــــل
كاللاش لـو تـــزرع به الطيب ينســاه
و الناس منهم من يحـــوش النفــــايـــــل
وان مات ما ماتت مع الناس ذكــــــراه
واعـــــلم عــــــن المقسـوم مالك بــدايـل
مقسوم لك ياتــــيك لـــو مــاتـحــــــراه
لابــــد مـــــن يوم بـه الـــعـــبـــد زايـل
و كــــل مــــا فعل من خير أو شـر يلقاه
المــال مـــــــا طــــــول يــــــدين بخـايل
يموت الردى ونفسه عن الطيب تنهاه
هــــذه الحقيقة لابــغـيـــت الصــمـايـل
وكـل عـلـى عيوبه تـــغـــطي مــــــزاياه
يامــــــوفقين الخـــيــــر عبر الوســــايل
ودوا كتابي وصـاحــب الخــــط يقـــراه
حتى لــــــــو اني حـدر غبر النـــثـــايـل
مـــــــروا على قبري دقـــــايـق مــواسـاه
ولا تحملوني فـــــــوق مـــاني بشــايـــل
يـــوم ان كـــــــل ينّشد عــــــن خطـــايـاه
قـــــامـــــت تصفـقني يمين و شمـــايــل
عجــــف السنين و كــــــل يـــــوم معـانـاه
أوصيك لا تبني على ســــــاس مـــــايــل
تـــرى ردي الســـــــاس مـــــاطــال مبناه
ولا تــــــاخــــــذ إلا مـــــن رفـاع الحمــايل
بنت الكـــــريم اللي كــــريمه سجــــايـاه
تــــأتي بحــــرٍ من خيــــار الســــلايــــل
شجرةٍ تمرهــــا تالــــي الوقت تجنــــاه
علــــيــــك بالطيب حميد الخصــــايــــل
ومن عاشر الطّيب على الطيب جــــاراه
وإلا الــــردي لو زوجــــوه الآصــــايــــل
أبعــــد عليه الطيب من حــــب علبــــاه
تـــــرفقوا يـــااهـل القـــلـوب الغــــلايـل
مـــابـالسـراب يقال أحد شـــــــرب مـاه
ومـن لا شـرب بيديه و السيل سايـل
مايرتوي مـن يــدين غيره لـو أسقـــــــاه
وختـامهـا عـــــــد المـــــزون الهـــمــــايــل
و مــاغـرد القمـري ومــــا حيٍ أوحــــــاه
صلوا على الهـادي لخير الرســـــايـــل
خير البرايا طيّب الــــــذكــــر و الجـــاه
ليست هناك تعليقات:
إرسال تعليق