عديت مع جــالٍ وحــدرت مـع جــال
من طبعي القاسي عشقت القساوة
ســود اللـيــالي علمتـني والأهــوال
شربت مــر الكـــأس قبل الحـــلاوة
آطا برجلي الشوك لو مالبس انعال
بــدوي تعـجـبـنـي حـيــاة الــبــداوة
البدو حلوين الطــبــايــع والأمـثــال
رجـــالٍ على ســود الليالي تخــاوة
رجـــالهم رجـــال رجــــال رجــــال
على القــســا واللين فيهم ضـــراوة
للضيــف مقـــريــن ولا حـــل نـــزال
قــامــوا بواجبهم بطــيــب وحفــاوة
فيهم على الشــدات صبر وسعة بال
وفيهم على كــســب المعــالي هقاوة
ولا أطاوع المخطي على كــل مــاقال
لاشفت مـــافــي مــن كـــلامه جداوة
كــم كلمةٍ بأسبــابها راحـــت رجـــال
وكم سببت بعــد الصــداقــة عـــداوة
كــم أحـــدثــت بين المحبـيــن زلـــزال
بعـض الجـــروح المعضلة مــاتـــداوة
أسمو بنفسي عــن دنيات الاعــمــال
لاشفت في بـعــض الأوادم دنـــاوة
أخـــذت رايي مــن رجــاجيل عقــال
أعـــالـج أمــوري بحـكـمـة وهــــداوة
أعـــز نفسي لـو نـبـت في الأحـــوال
ومــن لا بغــانـي فــأنــا عـنه بغـنـاوة
وان قلت أحب الناس ماعندي اشكال
لكـني أشــوف الـنـاس فيها جـفــاوة
ساسي قــوي ومعـربٍ عبر الأجـيـال
مــاهــو مـن اللي منأي هـزة يتهاوى
مــن لا بِـنَـا سـاسه على حجر ينهال
ينهـد لــو هــو مــن رفــيـع الـعـــلاوة
أوصيك لا تضعف لو الوقت بـك مـال
رغــم الظــروف اللي نبت بــك تقــاوة
خلك جــمــل صبـار للحـمــل شــيــال
وذيـبٍ لـيــا شفــت الذيــابــة تـعــاوى
بــعـض الرجــال جمال تبرك للأثقــال
وبــعـض الرجــال يقــال فيها رخـــاوة
وبعض الرجــال عقــولها تــوزن جبــال
وبـعـض الرجـــال يقــال فـيـهـا غـبــاوة
حسب اختلاف الناس تشخيص الأفعال
ايــديــك فيها أصــابـعـك مـــاتـســـاوى
