لاصرت بخير وعافية ولاأنت محتاج
ولا حـدتـك دنـيـاك لغـيـرك بحــاجــة
تحمد اللي رافـــعٍ سـبـعـة أفـجـاج
ولـيــا وعـيـت بتـالي الليل نـــاجـــه
ولايخلـفـك عـن مـوقـفـك كـل هــراج
لاصار مـايثبت دلـيـل احـتـجـاجــه
ولا تختصر خلك مع الناس سجاج
عند الذي لاجيت يضحك حجـاجـه
بعض الاوادم يـأخـذك بالاستدراج
باسلوبه الطيب وحسن انــدمـاجـه
وإلا البخيل بنظرتي مــالــه عــلاج
حتى ولـــو حـــاولــت نـادر عـلاجه
البارحــة ليلي تقــل لـيــل حـجــاج
لين الصـبـح بين وحــان إنـبـلاجــه
كني على نــــارٍ تــوهــج تــوهــاج
عـيـا يـطـفـيـها البحـر مـع مـواجـه
من هاجـسٍ لازال مزعجني ازعاج
وضيق علي الوقــت عقـب انفـراجـه
ياهــاجسي لــو تعتلي فـوق ميراج
مكتوب لك مقســوم باللي تـــواجـــه
اصبر لوان الوقت خـالـفـك وإنعـاج
لابـد مـايــــومٍ يـعـــــدل عــــــواجـــه
أما كسبت الطـيـب في كـل منـهـاج
ومــن يــزرع المعــروف يجني إنتاجه
وإلا تـرى الدنيا بها ضيق وإحــراج
وكـلٍ على مــا قيل يـعــرف خــراجــه
وربــك لمـــا يخـفـي الـغـيــب فــــراج
اللي فـرق عـذب البحر عـن هـمـاجـه
هـذا وأنـا مـانـي عـلى الشعـر دواج
إلا ان عرض لي جوهـره جبت تـاجه
آخــذ جـزيـل الـقـيل من بحر هـداج
ولا أبيع في سوق الرخيص وحراجه
ليست هناك تعليقات:
إرسال تعليق